ISOLA itulo lokudicilela phansi igama nesithunzi sayo iNgonyama uMisuzulu kaZwelithini ngezinkulumo ezisatshalaliswe ezinkundleni zokuxhumana, lapho izwakala ihilizisana nodadewabo.
Indlunkulu ikhiphe isitatimende iveza ukuthi inalo ulwazi ngalezi zinkulumo eziqoshiwe. Ithi kusobala ukuthi ziqoshwe ngaphandle kwemvume yeSilo.
Kulesi sitatimende indlunkulu isola umkhankaso wokungcolisa igama leSilo esisesihlalweni njengoba sekusondele izinsuku zokuqulwa kwecala lombango wesihlalo sobukhosi bamaZulu.
“Indlunkulu inalo ulwazi ngama-voice notes. Lolu wudaba oluzosentshenzwa wumndeni, kuzokwenziwa uphenyo lwangaphakathi.
“Emuva kokuphothulwa kophenyo kuzothathwa izinyathelo ezifanele. Umndeni wasendlunkulu ucela ukunikwa ithuba lokubhekana nalolu daba ngenhlonipho ngalesi sikhathi,” kusho isitatimende.
