IDEMOCRATIC Alliance isifake amaphepha eNkantolo yoMthethosisekelo okuvimba imizamo kaMnu Jacob Zuma yokungayikhokhi imali elinganiselwa ku-R29 million ayikweleta umbuso ngezindleko zamacala akhe ngqo.
UZuma ufake isicelo sokudlulisela phambili isinqumo seNkantolo ePhakeme neseNkantolo yokuDlulisela amaCala sokumenqabela ukuba adlulisele isinqumo sokuthi akhokhe le mali. Ngokusho kweDA asikho isidingo sokuthi uZuma adlulisele lesi sinqumo phambili njengoba kungekho okuphathekayo akuphikisayo ngaso, ngakho kumele ayikhokhe le mali njengomyalelo wenkantolo.
Ngo-2018 ibhentshi lamaJaji aseNkantolo ePhakeme lathola ukuthi uZuma kumele ayikhokhe imali yombuso ayisebenzisela izindleko zokubhekana namacala akhe. INkantolo eNkulu yokweDlulisa amaCala yakumisa ukuthatha isinqumo ngalolu daba ngo-2021. ‘
Ilungu leDA ePhalamende, uMnu Ashor Sarupen uthe akusekho ukujikela emuva kuZuma njengoba konke sekusezandleni zabameli bombuso ukuqinisekisa ukuthi uyayikhokha le mali.
“UZuma kumele enze okufanele njengoba lena kuyimali yomphakathi. Akumele ngabe ikhokhela izindleko zamacala osopolitiki abalwa izimpi ezingahlangene nombuso,” kusho uSarupen, eveza ukuthi akekho umuntu ongaphezulu komthetho eNingizimu Afrika, okuhlanganisa nowayengumengameli wezwe.
USarupen uthe iDA ngeke iluyekele lolu daba lushabalale njengoba izoqinisekisa ukuthi abakhokhi bentela imali yabo ayikhokheli izinto ezingahlangene nabo. Uthe ingakho iDA isiqome ukulifaka eNkantolo yoMthethosisekelo lolu daba ngenhloso yokuchitha uZuma angalidluliseli phambili.
