MTHOBISI SITHOLE
UFUNDE lukhulu ngokuwa emculweni umculi kamaskandi uZanefa Ngidi (osesithombeni).Lokho kumenze washintsha uhlelo lwezindlela zokukhipha umculo wakhe.
Lo mculi utshele ILANGA Lempelasonto ukuthi ukuwa kwakhe isikhathi eside kwezomculo, kumvule umqondo, washintsha ukwenza. Uthi uthwale kanzima waze wabuyela ekugibeleni amatekisi ngenxa yokushayeka kwezomculo.
Uthi njengamanje njengoba abantu bekhombisa ukuthakasela izingoma zakhe ezintsha, lokho kumenza abuyelwe yithemba ngomculo wakhe. “Ngibonga ukuthi abantu banginikile ithuba lesibili emculweni. Bekunzima kakhulu kungasayeki phambili, kodwa sengivulekile amehlo futhi kuyangisebenzela engikwenzayo nje-ngamanje,” kusho uZanefa.
Uthi uyiqophile i-albhamu yalo nyaka, kodwa uzoyidedela ngonyaka ozayo phakathi kukaFebruary) noMarch). Kulo nyaka ukhiphe izingoma ezimbalwa okubalwa kuzona ethi, “Isitulo Sasemcimbini”, “Isigora”, “Funda Mntanami” nethi, “X-yami”. Zonke lezi zingoma uzikhiphe ngezinyanga ezahlukene. “Le ndlela yokukhipha iyangisebenzela kakhulu futhi sengizogxila kakhulu kuyona,” esho.
Uthi usenqume nokungagxili kushuni kaBhekumuzi Luthuli (ongasekho). Uthi usezowuxuba ngendlela yakhe lo shuni, asebenzise isitayela sesima-njemanje azofika naso.
Ebuzwa ngengoma ethi, “X-Yami” enezinsimbi ezifana nezekhishwe yiGcokama Elisha, ethi “IGucci”, uthe le ngoma uyiqophe kuqala estudiyo, wadumala uma iGcokama selidlala izinsimbi zengoma yakhe emcimbini weDundee July, zezwakala zifana nezengoma yakhe engakayikhiphi.
mthobisis@ilanganews.co.za
