Kucishe konakala emcimbini iDrakensberg Extravaganza Music Experience eWoodstock Dam picnic site eBergville ngoMgqibelo izulu lifuna ukunyomfa yonke into.
Umcimbi uqale ntambama waze wasongwa ngeSonto ekuseni. Ngemuva kwawo emini kube ne-pincic yamahhala yokubonga izethameli nokuthi zikhokhe umoya wokuya emakhaya ziphephile.
Kuthe sekuzoqalwa amasango esevuliwe yayidliva imvula ihambisana nomoya ophephule izinto.
Ngenhlanhla kusheshe kwadlula wase uyaqala umcimbi kunandisa abaculi bendawo nabayizimenywa.
Kubukwe nebhola likanobhutshuzwayo umdlalo we-Orlando Pirates neMarumo Gallants weCarling Knockout.
Kuzokhumbuleka ukuthi umhleli womcimbi uSipho Ndaba wakhala ngokushodelwa yimali ngenxa yokungabi nabo abaxhasi. Lokho kwenza ukuthi ingabi khona eminye imicimbi yeDrakensberg Extravaganza efana neDrakensberg Marathon evamise ukwandulela lo mcimbi wenjabulo.
Nokho wathembisa ukuthi bazoqongelela konke abakutholayo ukuze ubuyele esimeni ngonyaka ozayo.
Abajabulise izithameli ngoMawhoo, Professor, Jumbo, Blaq Diamond, DJ Happygal, Thokozani Langa, Nkeshemba nabanye.
UMafikizolo ugcine engafikanga ngesizathu esingaziwa yize ebefakile kuFacebook ukuthi ungeminye yemicimbi ewu-6 azonandisa kuyo ngoMgqibelo.
