UKUMENYEZELWA komdlalo omusha iThonga kuqinisekise ukuphela komdlalo owuchungechunge Umkhokha obusuphenduke intandokazi kubabukeli phakathi nezinsuku seligamenxe ihora lesi-8.
AbakaMultichoice okuyinkampani eyengamele isiteshi sikamabonakude uMzansi Magic bamemezele ukuthi lo mdlalo omusha iThonga uyaqala ukukhonjiswa ngomhlaka-3 kuNdasa (March) okucacisa ukuthi Umkhokha uyagcina ukubonakala ekupheleni kwale nyanga.
ILANGA like labika ngonyaka owedlule ngokuphela koMkhokha njengoba abadidiyeli balo mdlalo bahluleka wukuphumela obala ukuqinisekisa ukuphela kwawo. Leli phephandaba labe lihabule ngemithombo yalo ukuthi nakuba lo mdlalo uke waba yintandokazi kubabukeli kodwa ubusuhluleka wukudonsa ababukeli njengoba izinombolo zawo bese zehlule nokuyisona sizathu esenze abakwaMultichoice bathatha isinqumo sokuwuhoxisa. Phambilini bakuqinisekisa ukuphela koMkhokha kodwa bakuchitha ukuthi imbangela wukwehla kwezinombolo zababukeli.
Umdlalo iThonga ubophele ubuso obujwayelekile kumabonakude njengoba umayelana nothando nobudlelwane obungahlukaniseki bamawele. Isikhulu esiphezulu sakwaMultichoice uShirley Adonisi sichaze lo mdlalo njengozoveza ibanga elingahanjwa ngabandawonye ukuvikelana kunoma yiziphi izimo. Uthe uzophinde uqhakambise usiko nokuhlangana kwemindeni ezimweni ezinzima. UBonko Khoza wodumo lomdlalo kamabonakude iThe Wife, nguyena ozodlala indawo yokuba yila mawele uSanele noBanele.
Ekhuluma ngokudlala lezi zindawo eyedwa uthe kube yisipiliyoni angasoze asilibala. Uthe akasakwazi ukulinda ukuze abone ukuthi abantu baseNingizimu Afrika bazowamukela kanjani lo mdlalo awuchaze njengothinta usiko lakwaZulu.
“Okungichaza ngalo mdlalo wukuthi uza nokuhlukile kumabonakude futhi nginesiqiniseko sokuthi ababukeli nakanjani bazowuthokozela,” esho. Phakathi kwabalingisi abazobonakala kulo mdlalo kubalwa u-Ayanda Borotho oseke wabonakala emidlalweni okubalwa kuyo Isibaya neSibongile And The Dlamini’s, Nelisiwe Sibiya oke wabonakala emidlalweni okubalwa kuyo Umkhokha neDurban Gen, Noluthando Ngema, Siphosethu Mabaso nabanye.
