Shono ke mfokaBiyela, ufisa INDONDO ibe isiliva noma eyamalahle ?
Ngale kwamancoko, ayiqiniso elimsulwa ngempela amagama akho Menziwa.
Ubamele impela owenu engezweni nasekubeni usozimelegeqe wensizwa.
Le “spirit” osibalulayo sokuzigqaja ngobujongo nobubhinca saba sobala ngikulamela okukuqala useyivukane unconywa uNgizwe iChunu ngo- October 2019 “thu tawuzeni en 12”.
Baningi owenu abakleza kogwansile la kuwena uma sekuziwa kwingezo.
Ngisho amanye amaciko angaphambili kwakho la kumaskandi asika iphethini la kuwe, wukuthi ngeke akuvume.
Usazodlondlobala uye kude kakhulu ngobuciko nokuba umdidiyeli kazwelonke wengezo kowenu.
Ngikuthuma kowenu ngoba izinsizwa (nezintombi) zibuthwa ngobudala bazo.
Udidiyela ingezo kwibutho lama-2000 nje wena, kunebutho elilanywa ilelo eladidiyelwa impisi yaseMdletsheni umfokaManqele osaphethe isicoco sengezo saseMantshontshweni.
Ngaphambi kwalokho umpetha wengezo kwakuyiChalaha umfokaShafuza phansi kwaJikijiki.
Ngaphambi kwalokho isicoco sasikwiBhova likaDikadaki ngePointer nogodo nemiyeko.
Thina ke njengoyihlo sadidiyelwa kwingezo umfokaMolo uBhekumuzi Luthuli kwaMaphamulo ingakho saze senza ama-S-Curl sakhonza amahembe amhlophe ngama early 90s.
Kukhona-ke okusamtalabho okungifikelayo kodwa ngizokwenza isisoka engakhuliswa ngaso ngokutshela emakhaleni mhla salamelana (no need for appointment).
Ume njalo qhawe uqhubeke nokuba i-INFLUENCER kodwa ungakhohlwa ukungena estudio uphekele abantu ingoma ngoba nangalapho UNGENHLA kakhulu kwabaningi ukuthi size sikhohlwe ubhizi kakhulu ukudlala uTikTok.
Isiyobonana eMantshontshweni, DBN ICC Arena makhathaleni!
Yimi okuvumayo
Mlamuli Nxele
UMabhulohlanyeni umfa Mahlomeka
KwaNomo eMgungundlovu
Founder – Amantshontsho KaMaskandi
