SENZO SOKHELA
USONGA ngokushiya kukhalwa e-Orlando Stadium ukaputeni weRichards Bay FC, uSimphiwe Mcineka (osesithombeni) njengoba bezobhekana ne-Orlando Pirates koweBetway Premiership namuhla ngoLwesibili ngo-19h30 kule nkundla.
IBay iya kulo mdlalo ihambela phezulu njengoba yedlulele kwi-semi final yeCarling Knockout yehlula ngo-5-4 wamaphenathi iCape Town City ngoMgqibelo ntambama eKing Zwelithini Stadium, eMlazi. Umdlalo ubuphele zibambene ngo-0-0.
UMcineka uthi bafuna ukwephula izinhliziyo zabalandeli beBucs enkundleni yabo.
IPirates ivutha ingabaselwe njengoba isayinqobe yonke (6) imidlalo yeligi esiyigijimile kule sizini. Isesicongweni ngamaphuzu awu-18.
“Ukunqoba kwethu iCape Town City kubuyise ukuzethemba. Lapho esiya khona (e-Orlando) siyolwa, ngeke sivume ukuthi
iPirates ithathe amaphuzu kithina. Siyazi ukuthi siya eSigodini – abathi kakuphunywa kusona – kodwa thina sizoya ngokuyihlonipha iPirates bese siyephula izinhliziyo ngokubuya nawo womathathu amaphuzu,” esho.
*Imidlalo yeBetway Premiership ephakathi nesonto iqhathwe kanje:
KUSASA NGOLWESIBILI
E-Orlando Stadium: Orlando Pirates vs Richards Bay 19h30.
NGOLWESITHATHU
E-Athlone Stadium: Stellenbosch vs TS Galaxy 19h30.
ELoftus Stadium: Mamelodi Sundowns vs Polokwane City 19h30.
