UMSAKAZO ongaphansi kwe-SABC iMetro FM umemezele ukuthi ubuyela eMbombela eMpumalanga nakulo nyaka umcimbi wawo wokuklomelisa abasendimeni yomculo obizwa ngeMetro FM Music Awards.
Lo msakazo uveze ukuthi lo mcimbi ubuyela kuleli dolobha ngokuxhaso lukahulumeni waseMpumalanga nenhlangano yenjinga yakuleli uMnu Patrice Motsepe iMotsepe Foundation.
Kuvele ukuthi umcimbi walo uzoba ngomhla ka-3 ku-May 2025 ezinkundleni zemidlalo iMbombela kanti umcimbi wokumenyezelwa kwabaqokiwe kulo mcimbi uzoba ngomhla ka-27 kuFebruary 2025.
Lo mcimbi ungomunye wemikhulu yokuklomelisa abaculi eNingizimu Afrika.
Isikhulu esiphezulu esiphethe imisakazo kwa-SABC uNada Wotshela ucashunwe wumthombo wabezindaba iTimesLive eveza ukuthi lo mcimbi udlala indima emqoka ekuthuthukiseni umkhakha womculo kuleli.
Uthe umcimbi wangonyaka owedlule ukhombise ukuba impumelelo eyisimanga kanti banethemba lokuthi nakulo nyaka uzokwenza okungaphezulu kunalokhu okulindelekile.
Uqhube ngokuthi okunye okuhle ngalo mcimbi wukuthi unikeza abaculi ithuba lokuzibonakalisa nokuqhambisa ngomsebenzi wabo kubathandi bomculo kuleli.
