INKOSI yakwaXimba uNgaye Mlaba, ibonge ukunikelelwa kwesikhungo sama-computer esizweni sayo, yathi lokhu kuzovala igebe phakathi komphakathi wasemakhaya nabahlala edolobheni.
INkosi uMlaba ibikhuluma enkantolo yesizwe kwaXimba, ngaseCato-Ridge ngoLwesithathu lapho abeCebolethu bebambisene nabemiklomelo yezindondo amaMetro FM Awards nomasipala weTheku benikelele ngesikhungo, esinama-computer angamashumi amabili nazosiza wonke umphakathi wakwaXimba namaphethelo.
“Lesi sikhungo singesokuqala ukubakhona endaweni. Siyabonga ukubakhona kwaso ukuze umphakathi ungaze uchithe imali eningi uya edolobheni uma udinga usizo oludinga i-computer. Yize isikhungo sikwaXimba kodwa kwamukeleke wonke umuntu ukuthi angeza kusona ukuzosisebenzisa noma ngabe uqhamuka kwezinye izindawo ezakhelene noXimba. Sizokwenza nesiqiniseko ukuthi isikhungo sizohlala siphephile ukuqinisekisa ukuthi izingane nomphakathi uhlala usizakala. Kuningi okungijabulisayo njengenkosi yakwaXimba okwenzeka endaweni yami njengoba nibona nje sesine-mall (inxanxathela yezitolo) esanda kubakhona endaweni njengoba nginikele ngendawo ukuthi yakhiwe. Njengoba nayo ikhona senza isiqiniseko ukuthi iphephile njengoba ingakaze igqekezwe,” kusho iNkosi uMlaba.
Ekhuluma neLANGA, uDkt Nomfundo Mcoyi-Zondo uthe isikhungo sizohlala sivuliwe zonke izinsuku futhi kuzohlala kukhona iWifi ukuqinisekisa ukuthi kwenzeka yonke imisebenzi edinga i-internet ngaphandle kokuthi umphakathi uze ungene ezindlekweni zokuthenga i-data.
Umphathi wezinhlelo kwiMetro FM, uMnu Siyanda Fikelephi uthe bazoqhubeka nokubambisana neCebolethu nomasipala weTheku ukulekelela abantu bakwaZulu-Natal lapho bedinga khona usizo. Uthe ngonyaka ozayo bazobheka okunye abangakwenza ukuthuthukisa umphakathi.
Kwenzeka lokhu nje imiklomelo yezindondo amaMetro FM Awards azobe eseThekwini ngoMgqibelo.
