LIZOKWANDULELWA ngomkhuleko idili lomcimbi wokubungaza iminyaka ewu-50 kwasungulwa i-IFP.
Lo mkhuleko uzobanjelwa KwaNzimela eMelmoth okuyilapho lasungulelwa khona leli qembu ngonyaka ka-1975.
Izolo ngoMsombuluko leli qembu belibambe imashi enokuthula lilibangise emahhovisi eReserve Bank enkabeni yedolobha iTheku ngenhloso yokwethula uhlu lwezikhalo zokungenami kwalo maqondana nesiphakamiso sokuvalwa kwebhange Ithala.
Umongameli waleli qembu uMnu Velenkosini Hlabisa wenze isimemezelo esibalulekile maqondana nomgubho waleli qembu.
Uthe ngomhlaka 21 kuNdasa (March) kophezulu kubanjwa umkhuleko.
“Umhlaka 21 wusuku okwasungulwa ngalo i-IFP. Ngomhlaka 23 kuzoba nedili elikhulu lomcimbi wokubungazwa kweminyaka ewu-50 i-IFP yasungulwa. Amaqembu amaningi afike kule minyaka sekuwumlando wokuthi ake abakhona. Ngosuku lomcimbi sizobe sinezimenywa ezahlukene okubalwa nabaholi bamanye amaqembu ezombusazwe. Umcimbi uzobanjelwa enkundleni yezemidlalo eqanjwe ngoMntwana wakwaPhindangene iNkosi Mangosuthu Buthelezi ongumsunguli we-IFP.,” kusho uHlabisa.
