SENZO SOKHELA
UKHALA ngama-agent abadlali angogombela kwezawo uHugo Broos oqeqesha iBafana Bafana njengoba ethi abulala abadlali bePremier Soccer League (PSL) ngokubakhethela amakilabhu abaphuphisayo.
UBroos – waseBelgium – usezakhele udumo ngokubeka imizwa yakhe njengoba injalo, kungakhathalekile ukuthi izokwehla kanjani kwabathile. “Sengikubone kaningi abadlali behamba eNingizimu Afrika, bafike bangadlaliswa emakilabhu amasha. Inkinga enkulu wukuthi bakhetha amakilabhu angabafanele abadlali. Kangikholwa ukuthi bayazikhethela, ngama-agent abo abakhethelayo ngoba efuna ukugcwalisa amaphakethe awo.
“Ngizokwenza isibonelo esiseduze nje, uMailula (Cassius, osesithombeni), ubeyaphi nje e-America, ubeyokwenzani? Uye ekilabhini lapho abeyobanga kuyona isikimu nabadlali ababili abebegijima eqenjini lesizwe lase-Italy. Umdlali waseNingizimu Afrika akasoze waba nethuba lokudlala kulesiya simo. Kumqoka ukuthi uma kuthathwa isinqumo esinjalo kubhekisiswe.
“Baningi abadlali abasebancane abahle, nokho kakufanele bahambe manje. Buka nje uCampbell (Shandre) kwiBrugge
(yaseBelgium), ngiyayazi ngoba ngihlalile khona, udlala ekilabhini encane yayo. Ngiyayazi le kilabhu ukuthi mhlawumbe ngokuphela kwesizini uzodlala esikimini esikhulu. Yiyona ndlela okufanele izinto zihambe ngayo. Inkinga wukuthi ama-agent yiwona anqumayo,” esho.
www.ilanganews.co.za
