WETHEMBISA ukubuya ngomfutho ophindiwe kunakuqala uXolani Khumalo okhuza ibuya ohlelweni lweMoja Love, iSizokthola, olulwisana nezidleke zezidakamizwa emphakathini.
Kujabule abaningi ngoMsombuluko kuvela ezithi asehoxisiwe amacala okubulala, ukuzama ukubulala nelokucekela phansi impahla uXolani abebhekene nawo, aholele ekutheni amiswe emsebenzini. NgoLwesibili iMoja Love ikhiphe isitatimende iveza ukuthi uXolani uyabuyela emsebenzini wakhe.
Ngemuva kokumiswa kukaXolani (Khumalo) kulolu hlelo, ngenxa yalawa macala, izintambo zinikwe uXolani Maphanga.
UKhumalo uthi yize ebuqonda ubungozi nobunzima obuhambisana nomsebenzi wakhe, kodwa ngeke alehlise igiya empini yezidakamizwa. UKhumalo ubesolwa ngokubulala uRobert Varrie (49) ngoNtulikazi (July) ku-2023, owayesolwa ngokudayisa izidakamizwa.
“Yebo ngijabule ngokuthi amacala abengibhekene nawo ahoxisiwe, kodwa njengomuntu ononembeza kuyangithinta ukuthi kunomuntu owalahlekelwa yimpilo yakhe.
“Umshikashika wethu uyaqhubeka. Isizwe sethu siyaphela ngenxa yezidakamizwa,” kusho uKhumalo
Ubonge umndeni wakhe nabo bonke abebemeseka njengoba kade egqigqa enkantolo ngenxa yamacala abebhekene nawo.
“Ngibonga nawo wonke umphakathi waseNingizimu Afrika oweseka impi yokuqeda izidakamizwa emiphakathini yethu. Sizoqhubeka nokulwa ukuqeda izidakamizwa, sisize nabafowethu abacwile kuzona ukubayisa ema-rehab.
“Lokhu kasizenzeli thina nje, kodwa senzela ikusasa lezingane zethu,” esho.
ULivhuwani Dagada oyiHead of Channel, eMoja Love, uthe ukubuya kukaKhumalo kulolu hlelo kuqinisa ukuziphophezela kwalesi siteshi ekulweni nobugebengu nezidakamizwa emiphakathini.
Isizini yesine yeSizokthola kubhekwe ukuba iqale maduze ukukhonjiswa kuMoja Love.
