NGUSIYANDA “Magazi” Xulu ongumdlali weBafana Bafana nomphathi wakhe uLebohang “Guluva” Mashishi
ULIBHEKISE e-Europe umdlali weqembu lesizwe lakukeli iBafana Bafana obengasenamsebenzi ngemuva kokugqabula ifindo lo mshado neSuperSport United ngesizini edlule.
ILANGA lithole ngemithombo yalo ukuthi uSiyanda “Magazi” Xulu odlala emuva kwiBafana usendleleni ebheke eRomania, lapho eyohlolwa khona ngamakilabhu amabili akhona.
Izindaba zokuhamba kwalo mdlali ziqinisekiswe ngumphathi wakhe uLebohang “Guluva” Mashishi.
“Yebo yiqiniso ukuthi usendleleni ebheke eRomania, usuke kuleli izolo ebusuku. Ngisanda kukhuluma naye usaseNetherlands, ulinde ukugibela bese eya eRomania. Kunamakilabhu amabili akhona acele ukuzombonela eduze kwazise kade agcina ukudlala.
“Okwamanje ngeke ngikwazi ukuwadalula la makilabhu ngoba kusaxoxwa, kodwa kona kuyathembisa. Uma konke kuhambe, kahle uzonikwa inkontileka emfushane ezophela ngoZibandlela (December), enesivumelwano sokuyelula,” kusho uMashishi.
