OSOMABHIZINISI bathembise ukutshala imali engu-R124.5 billion kwaZulu-Natal ngesikhathi benza izethembiso kwingqungquthela, iKZN Investment Conference ebise Inkosi Albert Luthuli International Convention Centre, ngoLwesine.
Lezi zindaba zivele kwingqungquthela ebihanjelwe nguNdunankulu wakwaZulu-Natal, uMnu Thamsanqa Ntuli, obehamba noNgqongqoshe weZohwebo, ezeZimboni noKuncintisana kuZwelonke, uMnu Parks Tau, uNgqongqoshe wezokuThuthukiswa koMnotho, ezokuVakasha nezeMvelo kwaZulu-Natal, uMfu Musa Zondi neMeya yeTheku, uMnu Cyril Xaba.
Ngesikhathi sengqungquthela abatshalimali bathe bayasethemba isifundazwe iKwaZulu-Natal ukutshala kusona le mali. Le mali yeqe ngo-R29 billion emalini ebibhekwe yisifundazwe ukuthi izotshalwa kusona ngo-2026 ebesibheke u-R95 billion.
Ethula inkulumo kwingqungquthela undunakulu uveze ukunyuka kwesimo sokuphila okudalwa yizinto eziningi emhlabeni, abale kuzona izibhelu zaseFrance, e-India, Bangladesh nempi ephakathi kweRussia ne-Ukraine kanye nengxabano ephakathi kwe-USA ne-Iran.
Unxuse abatshalimali ukuthi bayibheke ngeso lomhlaba indaba yokutshala imali nokuzokwenza baqonde ngezibhelu ezike zaba seThekwini muva nje. Uphinde waqinisekisa abatshalimali ukuthi izibhelu ngeke zibekhona kulesi sifundazwe kusekhona yena njengondunankulu wakwaZulu-Natal.
Uthe le mali ezotshalwa uzokwenza isiqiniseko ukuthi ifinyelela kuzona zonke izifunda.
“Isifundazwe esithuthuka endaweni endaweni eyodwa sisengozini. Ngicela niyifake imali ngoba ikwaZulu-Natal ivulelekile kumabhizinisi,” esho.
