UKHUZA ibuya uMinnie Ntuli kwiGagasi FM ngemuva kokuthatha ikhefu lamasonto amahlanu, kulandela isigameko esenzeka kwi-The Real Housewives esaqubula umsindo ezinkundleni zokuxhumana. Lapho ayebonakala exabana noLondie London beqophisana ngamagama, wagcina uMinnie ephusha uLondie ngendluzula esiphongweni esebenzisa umunwe.
Abaphathi besiteshi baqoka ukunikeza le msakazi ikhefu ukuze athole izindlela zokubhekana nentukuthelo kangcono. Esitatimendeni esikhishwe yiGagasi FM namhlanje lithi belilokhu leqaphe isimo sikaMinnie futhi lixoxisana naye. Kanti nombiko wezempilo abawutholile uqinisekisa ukuthi usekulungele ukubuyela emsebenzini. Ngakwezomthetho ithimba labameli balo msakazi kuthiwa likuqinisekisile ukuthi kazikho izinyathelo zezomthetho athathelwe zona. Ngokubuka konke lokhu iGagasi lenze isinqumo sokuba abuyiselwe ohlelweni abelusakaza. NgoMsombuluko mhla ka 18 August uzobuyela ohlelweni alusakaza noFelix Hlophe, iThe Uprising olusakazwa kusukela ngelesi 06h00 – 09h00 ngoMsombuluko kuya kuLwesihlanu.
Ephawula uMinnie esitatimendeni uthe: “Ngiyajabula ukubuyela emoyeni, emasontweni ambalwa edlule ngibuyekezile ngazama ukuzithola. Kuwona wonke umuntu engimphoxile ngesenzo sami ohlelweni lwakumabonakude, ngiyaxolisa futhi. Kozakwethu kwiReal Housewives of Durban ngiyaxolisa ngezenzo zami. Ngiyabonga kuwowonke umuntu ongeseke esikhathini esinzima empilweni yami. Ngicela nokubonga iGagasi ngokunginika elinye ithuba. Ngifundile emaphutheni ami, ngibuya nokuzimisela ekutheni ngibe umuntu ongcono, ngethembisa nokwenza kangcono,” esho.
IGagasi libonge igalelo likaNkulee Mbatha obebambile ngesikhathi uMinnie esekhefini.
