UNGQONGQOSHE wezeMpilo KwaZulu-Natal, uNkz Nomagugu Simelane unxusa imindeni ukuba yeseke abanezifo ezingamahlalakhona njengoba kuyisikhathi sentokozo yamaholidi kaDisemba.
“Njengemindeni kumqoka ukweseka abathandiweyo ukulawula izifo ezingamahlalakhona ukwehlisa ingcindezi yezifo emphakathini yethu. Masithokozele amaholidi kaZibandlela ngendlela ephephile, senze izinqumo eziphephile nezinempilo,” kusho ungqongqoshe.
Uthe nangamaholidi kubalulekile ukuba abantu badle imishanguzo yabo yezifo ezingamahlalakhona okubalwa kuyo eyeTB, iHIV, isifo sikashukela neBP ngendlela okuyiyo.
Lo mnyango uzobe unomkhankaso kusasa ozoqala eBlue Lagoon uphethe eSouth Beach eThekwini wokugqugquzela ukuzinakekela ngokwezempilo, lapho uNkz Simelane ezobe egqugquzela amalungu omphakathi ukuba aziqaphe.
Umnyango uzogqugquzela ukudla imishanguzo ngendlela eyiyo, ukuzibandakanya ocansini oluphephile, wexwayise ngokuphuza utshwala ngokweqile nokusetshenziswa kwezidakamizwa.
