KUPHOQELEKE ukuba azile amasonto amabili ukuze akwazi ukungena khaxa endaweni obekumele ayilingise emdlalweni, “Isitha: The Enemy”, umlingisi ongaconsi phansi kubalandeli bakhe, u-Andile Mxakaza.
Isitha sikhonjiswa esiteshini sikamabonakude i-e.tv ngo-20:30 ngoMsombuluko kuya kuLwesihlanu. Ulingisa indawo kaZikhali ‘Mapholoba’ Ngcobo, uthi into emdonse ukuba alingise le ndawo, yingoba ubesekhathele ukudlala into eyodwa. Uthi njengoba ungena kule sizini yesine, udlala indawo yomuntu oshonelwe yindodakazi, okwenze washintsha ubuyena.
“Ukulahlekelwa yindodakazi, kumenze waphenduka uhlanya, wasebenzisa ubuhlungu ukuziphindiselela. Uma eyilingisa le ndawo ushintsha ngisho indlela akhuluma ngayo, asho ngisho imilolozelo,” echaza.
Echazela ILANGA ngesidingo sokubopha ibhande ngaphambi kokuba adlale le ndawo, uthi: “Ziningi izinto ezike zenzeka phambilini. Ukuzila ukudla kungakhile kwamina, indawo engiyidlalayo ingikhulisile. Ziningi nezinto ezike zenzeka ngaphambi kokuba ngifike la esengikhona, kwesinye isikhathi sigcina sikhohlwa nawukubala izibusiso, kuyisibusiso nokuthi ngithole lo msebenzi.”
U-Andile uthi ngesikhathi ethatha isinqumo sokulingisa le ndawo, kwafika izwi kuyena elithi kumele ayidlale njengabantu ababili, abehlukene. Uthe ngesikhathi ethola lo msebenzi wayesepakishile nomndeni wakhe, bezimisele ngokufulathela iNingizimu Afrika, ngoba ebona ukuthi izinto kazihambi ngendlela afisa ngayo. Uthi umdlalo Isitha, uzoshintsha izinto eziningi kule sizini.
“Kunzima ukushonelwa yingane. Abanye bayawa bafe, noma bashaywe wuhlangothi kube nzima nokuvuka bazithathe. Ngingene kulezo zicathulo ukuzama ukulingisa le ndawo. Kunesikhathi lapho uma ngivukwa wumunyu ngize ngithi, “Igugu lenhliziyo yami”, ngenhloso yokuchaza ubuhlungu engidlula kubona nothando enginalo ngengane yami, ukuthi iyikho konke. Ukuhamba kwayo kungishiya ngilimele emoyeni.
“Indlela engishintshe ngayo kulo mdlalo, ingenze ngaba ngenye into kwamina engingayikholwa uma ngizibuka esibukweni,” echaza. Lo mlingisi wazakhela udumo elingisa indawo kaFezile emdlalweni Isibaya.
