INHLANGANO elwela amalungelo abantu iSouth African Human Rights Commission (SAHRC) ithi igculisekile ngesimo esifice ejele laseWestville ngesikhathi ilivakashele, ngoLwesibili.
Lokhu kuvezwe wumbiko okhishwe yisikhulu esiphezulu sale nhlangano, uNkz Philile Ntuli. Ukuvakasha kwale nhlangano kuza ngemuva kokuvela kwezikhalo zokungagculiseki kweziboshwa ngendlela okuqhubeka ngayo izinto emajele.
Ngasekupheleni kwenyanga eyedlule, uMnyango wezokuHlunyeleliswa kweziMilo umemezele ukuthi sewulushintshile uhlelo lokudla emajele, wanciphisa izinsuku zokudliwa kwenyama yenkomo, eyenkukhu nenhlanzi. Izikhala zalokhu kudla zivalwe ngobhontshisi, isoya namaqanda.
Umnyango uveze ukuthi ukushitsha kwalolu hlelo akungoba ushodelwa yimali, kodwa uzama izindlela zokonga nokuguqula izinto. Uthe lolu hlelo luzokonga imali engaphezu kuka-R200 million ngonyaka.
UNkz Ntuli uthi bahlole izintoi eziningi ebekukhalwa ngazo, bathola ukuthi ijele liphethwe kahle, ikakhulukazi ohlangothini lwabesifazane neziboshwa ezincane.
“Imibiko beyithi iziboshwa ziyahlukumezeka, nesimo senhlalo kasisihle. Esikutholile ukuthi amalungelo azo kawahlukunyezwa, ikakhukazi lelo lamanzi ahlanzekile, ukudla okuhlanzekile, nelokuhlala endaweni ehlanzekile futhi ephephile. Ubudlelwano beziboshwa nojele buhle kakhulu,” esho.
Uthi zikhona izinkinga abazificile kodwa kaziwahlukumezi amalungelo eziboshwa. Phakathi kwazo wukugqoza kokubuya kwezimpendulo zamacala aphenywa yi-Ipid avulwe yiziboshwa, nemidonsiswano ephakathi kwazo nabammeli.
