Ukhathazwe ngomama abaneminyaka ewu-15 ubudala uNgqongqoshe wezeMpilo uNkk Nomagugu Simelane-Mngadi ngesikhathi ehambele izibhedlela, eyohalalisela omama ababelethe ngosuku lukaKhisimusi.
UNkk Simelane-Mngadi, ekhuluma emsakazweni iGagasi FM, uthe nakuba kukuhle ukwemukela umphefumulo emhlabeni, kodwa usakuthola kunzima ukuhalalisela amantombazane amancane kakhulu uma ebelethile.
Uthe uhlale eshumayela ivangeli lokuthi intsha izithibe ocansini. Unxuse nabesilisa ukuthi bayisukumele le yokukhulelisa amantombazane amancane njengoba kowesifazane okhulelwayo, kusuke kunesandla sowesilisa.
UNkk Simelane-Mngadi uthe kulolu suku lukaKhisimusi, mathathu amantombazane aneminyaka ewu-15 abesabelethile. Uhalalisela bonke omama ababelethe ngalolu suku, wafisela nezingane ezizaliwe impilo ende.
Khonamanjalo, noNdunanku waKwaZulu-Natal uMnu Thami Ntuli ubeyingxenye yalo mkhankaso wokuhambela izibhedlela, ukuyohalalisela omama nezingane ezizalwe ngalolu suku.
