UNIKELWE ezandleni zamaphoyisa aseMpumalanga owesilisa obhadanywe ngamaphoyisa esendaweni yokulala esenkabeni yedolobha iTheku, obefunwa ngezinsolo zokubulala abesifazane, ezigamekweni ezahlukene.
Umsolwa (40) besekuphele iminyaka emithathu efunelwa amacala amabili okubulala. Ngokusho kokhulumela amaphoyisa KwaZulu-Natal, uColonel Robert Netshiunda, amaphoyisa athole umkhondo ngowesilisa obehlela ukubulala izingane zakhe.
Ubefunelwa icala lokubulala unina wezingane zakhe esigamekweni esenzeka eVolkrust, eMpumalanga, ngeNhlolanja (February) ku-2023. Kubikwa ukuthi, emuva kokugila lo mkhuba, umsolwa wabalekela eSwaziland nakhona okuvela ukuthi wafike wagila umuga ofanayo, ngokubulala intombi yakhe.
“Ngenkathi eboshwa umsolwa, kutholakale ukuthi ubehlela ukuyobulala izingane azithole nomufi wokuqala eVolkrust. Kusukela ngo-2023 ubelokhu ebalekela icala alenza eMpumalanga. Emuva kokuboshwa, ube esenikelwa emaphoyiseni aseMpumalanga okuyilapho khona ezobhekana namacala akhe,” kusho uNetshiunda.
