UNgqongqoshe wamaPhoyisa uMnu Senzo Mchunu usenqume ukuluhlakaza uphiko lwamaphoyisa obelubhekelele amacala athinta ukubulala okuhlobene nepolitiki KwaZulu-Natal.
Lolu phiko lwasungulwa ngo-2019 kulandela umbiko weKhomishana ka-Advocate Moerane Marumo, egcine yaziwa ngeleMoerane Commission, eyayiphenya ngokubulawa kosopolitiki esifundazweni.
Encwadini ayithumelele uMkhuzi wamaPhoyisa kuzwelonke uLt-Gen Fannie Masemola, uMchunu uthe lolu phiko lwamaphoyisa kalusizi ngalutho oluthinta ukusebenza kwamaphoyisa ezweni.
“Ngokubona kwami lolu phiko kalusadingeki ukuthi luqhubeke nokuba khona, futhi kaluwasizi ngalutho amaphoyisa ekusebenzeni kwawo. Yingakho nginqume ukuthi iSAPS Political Killings Task Team ihlakazwe,” kusho uMchunu.
Uthe lolu hlaka lwalusungulelwe ukuqeda, ukuphenya, nokuxazulula udaba lokubulawa kosopolitiki esifundazweni.
Uyalele ukuba lolu phiko luhlanganise umbiko ngomsebenzi oluwenzile selokhu lwasungulwa, bese luwethula kuyena.
