UZOHLONISHWA ngencwadi ezobe ikhuluma ngempilo yakhe nangemicimbi yokumkhumbula minyaka yonke u-Albert Mazibuko oyinkakha leqembu iLadysmith Black Mambazo obekwe endlini yakhe yokugcina ngoMgqibelo ekuseni ngaphambi kokuthi kuqale inkonzo yakhe yomngcwabo.
UMazibuko udlule emhlabeni emasontweni amabili adlule ngemuva kokuxinwa wukugula isikhashana.
Ngokusho kukaXolani Majozi oyiManager yeLadysmith Black Mambazo nakuba uMazibuko ebesethathe umhlala phansi kuleli qembu kodwa ubesaqhubeka nokuba ingxenye yalo uma lizilungiselela futhi eqhubeka nokulicathulisa njengoba ebesefana noyise kumalungu alo.
UMajozi uthe bazokwenza isiqiniseko sokuthi igama likaMazibuko kalishabalali njengoba eveze ukuthi bazoshicilela incwadi ezokhuluma ngempilo yakhe baphinde bakhiphe neziqophamlando ezizobe ziveza iqhaza namagalelo akhe. Uthe kuzoba nemicimbi abazoyihlela ukumkhumbula minyaka yonke.
Enkonzweni yomngcwabo ebiseMtshezi High School e-Estcourt ebihanjelwe izicukuthwane ezahlukene uMazibuko uchazwe njengenqolobane yeqembu njengoba nguyena obesesele kumalungu okuqala aleli qembu.
Phakathi kwezicukuthwane ebezihambele le nkonzo kubalwa uNdunankulu waKwaZulu Natal uMnu Thami Ntuli, iPhini likaNgqongqoshe wezemiSebenzi yoMphakathi uMnu Sihle Zikalala, uMnu Zizi Kodwa oke waba nguNgqongqoshe wezobuCiko namaSiko nezemiDlalo kuzwelonke, iMeya kaMasipala waseMtshezi uMnu Mduduzi Myeza, uNkk Bongi Sithole Moloi nezinye.
Le nkonzo ibihanjelwe nangamaciko ahlukene okubalwa kuwo iNcandweni Christ Ambassadors, Thee Legacy, Abanqobi, Phindi P obengumphathi wohlelo namanye.
