KUSE ngokunye yethweswa icala lesithathu lokubulala iNkosi yesizwe saKwaNxamalala, eMpendle, ebhekene necala lokubulala ikhansela leDA nowayengundunankulu wesizwe.
INkosi Simphiwe Eric Zuma (56) isolwa ngokubulala umshana wayo uMnu Nhlalayenza Ndlovu, owayengusotswebhu weDA kuMasipala uMngeni ngoZibandlela (December) ka-2023, nokubulala uMnu Qalokunye Zuma owayengundunankulu wesizwe saKwaNxamalala, khona eMpendle.
INkosi Simphiwe Eric Zuma (56) yengezelwe icala lesithathu lokubulala uMnu Xolani Ntombela owayeyilungu lomphakathi, ewabulawa ngo-2022.Â
Kuthiwa bobathathu abafi babeyizishoshovu eziphikisana nokuthengiswa komhlaba ngemali eshisiwe eMpophomeni. Izolo ngoMsombuluko inkosi ibivele eNkantolo yeMantshi yaseHowick iyofaka isicelo sokudedelwa ngebheyili, ecaleni lokufa kukaNdlovu.Â
Maqondana necala lokubulawa kukaNtombela, inkosi iboshwe noMnu Thembelani Mbatha, okusolakala ukuthi uyinkabi eyasoconga uNtombela.Â
Umshushisi omkhulu kuleli cala, u-Advocate Lawrence Gcaba, utshele inkantolo ukuthi uphenyo lwabo selusemaphethelweni futhi basezinhlelweni zokuba kuboshwe umsolwa wesithathu kuleli cala.Â
Ecaleni lokubulawa kukaNdlovu, inkosi iboshwe noMnu Thabani Hlongwa, uMnu Khayelihle Shabalala, induna yaseMpophomeni uMnu Zwelithini Buthelezi eyaphenduka ufakazi wombuso kuleli cala, noMnu Thabo Mathonsi okuvela ukuthi wahlela ukubulawa kukamufi esejele laseWestville.Â
Icala lihlehliselwe uMsombuluko okuyilapho khona kuzohlelwa usuku lokulalelwa kwesicelo sokudedelwa ngebheyili kwenkosi. Uphenyo lalawa macala luholwa wuphiko oluphenya amacala athinta ukubulawa kosopolitiki nabaholi bomphakathi esifundazweni.Â
Inkosi ishaqwe ngamaphoyisa aphenya lawa macala isemzini wayo ngenyanga eyedlule.
