NONHLAKANIPHO SHINGA
INTOKAZI eyayithandana noKiernan Forbes owayedume ngelika-AKA, uNadia Nakai, useveze ukuthi ekupheleni kwale nyanga uzokhipha i-albhamu azophinde abungaze kuyona lo mculi osekuphela iminyaka emibili namhlanje ngoMsombuluko abulawa.
Le albamu ezophuma ngoLwesihlanu ngomhlaka 28, ibizwa ngokuthi yi-Bragaccy, uthi kakulona iqoqo lezingoma kepha yindlela akhumbula nahlonipha ngayo u-AKA nangeqhaza alibamba emkhakneni wezomculo nasempilweni yakhe. Uthi unethemba lokuthi i-Megacy, ongungabalandeli ba-AKA bazowuthokozela lo mculo.
Uthi i-Bragaccy ifana nencwadi yothando ayibhalele u-AKA. Kwashaqeke abaningi ngomhlaka 10 kuNhlolanja (February) wangonyaka ka-2023, kudutshulwa kubulawa lesi sihlabani somculo ebesingaconsi phansi kubalandeli baso. U-AKA wabulawa noTebello “Tibs” Motsosane, owayengumngane wakhe, eMorningside, kuFlorida, eThekwini.
Ukubulawa kuka-AKA kushiye abaningi bengawuvali umlomo ikakhulukazi emkhakheni wezomculo kube sekuvela nokuthi ngaphambi kwalesi sigameko wayeke wathola ukuxwayiswa ngabathile ukuthi angalinge alubhade eThekwini ngemuva kokushona kwengoduso yakhe u-Anele Tembe, okuthiwa bathi bekade benengxabano ehhotela eliseCape Town, waziphonsa phansi washona. Ngemuva konyaka kushone u-Anele, u-AKA ube eseveza ukuthi usethandana noNadia Nakai kanti abaningi bakhombise ukubujabulela ubudlelwano babo nomndeni wakhe u-AKA.
“Kule albhamu kuningi okuzoqhamuka ebengifisa ngabe ngakwazi ukukusho kuyena u-AKA, ngizokusho kuyona le-albhamu. Lena kuseyindlela yokuzelapha ngemuva kokulahlekelwa ngumuntu engangimthanda,” kusho yena.
Phakathi kwamasingili asewakhiphile kukhona ingoma ethi-“M.E.G.A” ayenzo noCindii Masina, yingoma ayenze nentokazi yaseThekwini uShekhinah ethi “Missing You”, ephrojuswe nguZakes Bantwini. Ngemuva kokumemezela ukuphuma kwale albhamu, abalandeli bakhe naba-AKA kubonakale bekhombisa ukuzithakasela lezi zindaba.
nonhlakaniphos@ilanganews.co.za
