ISIGUQULWE izinhlamvu zaba ngezokuxwayisa nokuqwashisa ngesihlava esibhokile sodlame olubhekiswe kwabesifazane nezingane ingoma yodumo kaShwi noMtekhala esihloko sithi, “Ngafa” esiqanjwe ngokuthi “Bafa”.
Le ngoma, yashisa izikhotha kusukela ngo-2004. Muva nje ngesikhathi leli qembu limenywe emsakazweni iMetro FM, lathola ithuba lokuthi liyicule ngendlela ehlukile, njengoba bekubhokile endaweni yaseKurhuleni, eGoli ukuhlaselwa nokubulawa kwabesifazane.
Ngemuva kwalokhu, lo msakazo ube usunxusa leli qembu ukuba liyiguqule le ngoma, iphenduke eyokuxwayisa nokuqwashisa ngodlame olubhekiswe kwabesifazane nezingane. Nebala leli qembu liyenze kanjalo, isizokhishwa kabusha isinesihloko esithi, “Bafa” nesizoba yingxenye yomkhankaso walo msakazo wokulwa nalesi sihlava.
Isitatimende esikhishwe ngabomsakazo iMetro FM, sinxuse eminye imisakazo ukuba isebenzise le ngoma ukulwa nalolu dlame olubhokile kuleli. Umphathi wezinhlelo kulo msakazo uNathi Nestle uthe umsakazo unamandla wokufinyelela emajukujukwini omhlaba, ngakho ngesikhathi uShwi noMtekhala besebenzisa amaphimbo abo beshintsha le ngoma, kwaba nombono wokuthi mabangagcini ngokuyishintsha emsakazweni kuphela kodwa mabayiqophe kabusha ibe yingoma ezimele.
“Isihlava seGBV eNingizimu Afrika sibi kakhulu, ngakho ukusebenzisa umculo ukusinqanda kuyithuluzi elihle kakhulu,” kusho uNestle.
Uthe beyisiteshi banesifiso sokuthi le ngoma kungabi ngeyeMetro FM kuphela kodwa kube ngeyeziteshi zonke zaseNingizimu Afrika, ziyidlale iphindelela ngoba inezinhlamvu ezikhuthazayo futhi ezingaba wusizo ukulwa nale nkinga. Le ngoma isiyatholakala kuzona zonke izinkundla ezithengisa ngomculo.
UShwi uthe umculo udlala indima emqoka empilweni, uma kujatshulwe umculo ukhona kanjalo noma kukhalwa umculo ukhona ukududuza abantu. Uthe njengamaciko kumqoka ukuba basebenzise ubuciko babo ukuthinta izihloko zansukuzonke zempilo ezinhle nezimbi.
UShwi usanda kuba ingxenye yomkhankaso olwa nesifo senhliziyo. Nakuwona lowo mkhankaso wenze ingoma ekhuthaza abantu ukuba bahlolele lesi sifo kusanesikhathi futhi benze konke ukuzinakekela ukuze babe yimiqemane, ukugwema izifo ezihlobene naso.
