UNGAFUNGA ukuthi kudlalwa owamanqamu phakathi kwamaqembu amakhulu ebhola likanobhutshuzwayo eNingizimu Afrika eMoses Mabhida Stadium, eThekwini, lapho nomcimbi wokugubha unyaka kwasungulwa iMK Party.
Imigwaqo engenela kule nkundla ivaliwe njengoba amaphoyisa etshalwe ezindaweni ezahlukene ukuqapha nokulawula isiminyaminya. Izinkumbi zabalandeli baleli qembu ziyaqhubeka nokungena ngaphakathi kule nkundla.
Kugqame imifaniswano yemibala yaleli qembu ngaphandle kwale nkundla njengoba abantu bedele ilanga elikhipha umkhovu etsheni, ukuzogubha naleli qembu lasungulwa. Abanye bafake imifaniswano yamasosha.
Ngaphakathi enkundleni, abalandeli baleli qembu sebeqale ukugcwala. Kukhona namabutho adlubhe ingqephu yaKwaZulu. Basathokozela umculo oqhuluwa ngabaculi abahlukene. Ubuholi baleli qembu nosaziwayo, sebeqalile ukubonakala bungena ngaphakathi kule nkundla.
Intatheli: Lucky Cain
