UBUHOLI be-African National Congress (ANC), butshele amakhansela alenhlangano abehlangene eFNB Stadium, eSoweto, ukuthi awabhukule ukuze bahlabane okhethweni loHulumeni baseKhaya lwangonyaka ozayo. Abalelwa ku-4 600, amakhansela e-ANC abebuthene, njengoba kulungiselelwa ukhetho oluzoba phakathi kwenyanga kaLwezi (November) ngo-2026, noMasingana (January) ka-2027.
Ngokhetho lokugcina loHulumeni baseKhaya, olwalungo-2021, i-ANC yathola amavoti angu-46%, yehla kusuka ku-66%, eyayiwuthole ngo-2006. Omasipala abakhulu iPretoria neKurhuleni, i-ANC yahluleka ubawagcina.
UMengameli uCyril Ramaphosa, ekhuluma namakhansela, ugcizelele ukuthi abantu abaqhuba inkohlakalo komasipala, mabangavikelwa, wathi i-ANC ingafunda kumakhansela eDemocratic Alliance, ngendlela aziphatha ngayo nangendlela ezimisela ngayo. Uthe kuyinto engafihliwe ukuthi iningi lomasipala abenza kahle, ngobaphethwe yiDA.
USihlalo we-ANC kuzwelonke, uMnu Gwede Mantashe, uthe acula kahle amakhansela enhlangano, kodwa uma sekuthiwa awasebenze “dololo”. Amakhansela abevela kuzo zonke izifundazwe, kanti lokhu sekuwukuqala lochungechunge lwemikhankaso yokhetho lohulumenni basekhaya.
menzi.jele@ilanganews.co.za.
