IHHOVISI likaMengameli uCyril Ramaphosa, lichitha izinsolo zokuthi liyalele umsakazeli womphakathi iSABC, ukuba ingaqhubeki nohlelo olupheka ngobhojwana osopolitiki iFace the Nation, ngemuva kokungenami kwamalungu e-ANC, ngemibuzo enzima abuzwa yona kulolu hlelo.
Lezi zinsolo zivezwe yiphephandaba iSunday Times, ngemuva kokuba umethuli walolu hlelo uClement Manyathela (osesithombeni), enikele ekhasini lakhe le-X (twitter), waqinisekisa ukuthi waziswe yizikhulu zeSABC ukuthi lo msakazeli womphakathi awusenayo imali yokuqhubeka nokuqoshwa kwalolu hlelo, yize iningi lezakhamizi zakuleli ziluthakasela.
UManyathela uveze ukuthi ngonyaka odlule izikhulu ezaziphethe eSABC zamazisa ukuthi lolu hlelo lwenza kahle njengoba lunezinombolo zababukeli izinhlelo zezindaba ezagcina ukuba nazo esikhathini esicela eminyakeni emine eyedlule. Imibiko iveza ukuthi ukungenami kwalabo sopolitiki kugqame kakhulu ngemuva kwengxoxo eyayiphakathi kukaManyathela ongumethuli walolu hlelo, nokhulumela ihhovisi likamengameli uMnu Vincent Magwenya, ngasekuqaleni kwalo nyaka.
Phakathi kwemibuzo eyabuzwa yabhekiswa kuMagwenya wukuthi, kungani umengameli ewenze wayimfihlo umbiko weKhomishini kaMadlanga, nokuthi kungani uNgqongqoshe wamaPhoyisa owanikwa ikhefu eliyisipesheli uMnu Senzo, Mchunu engaxoshiwe. Imibiko ithi lokhu kakwehlanga kahle ehhovisi likamengameli, layalela izikhulu zeSABC ukuba ziluvale lolu hlelo.
Ephawula ngalezi zinsolo, uMagwenya uthe ihhovisi likamengameli kalihlangene nokuqedwa kwalolu hlelo.
“Lezi zinsolo azilona iqiniso. Akukho ukugxambukela kwepolitiki esinqumweni seSA-BC sokuqeda lolu hlelo. I-SA-BC nomethuli wohlelo mabaphumele obala, batshele abantu isizathu sokuqedwa kwalo,” kusho uMagwenya.
Iziphendulela iSABC, izichithile lezi zinsolo, yathi beyivele isezinhlelweni zokushintsha izinhlelo ngokungenzi kahle kwazo.
“Lolu hlelo lufana nazo zonke izinhlelo zethu esizibekele izi-dlela ekumele zisebenze ngazo (perfomance target). Izinguquko esizenzayo, sizenza ngokubheka izinombolo zababukeli, nohlobo lomsebenzi owenziwa wuhlelo. Akulona iqiniso ukuthi kukhona abangaphandle, abaphoqe ukuba kumiswe uhlelo,” kusho iSABC.
