IKHUZA ibuya ingqungquthela ebizwa ngeThe Menopause Summit, egxile ekuhlomiseni abesifazane ngokungabasiza uma sebefike esigabeni sokukhula esaziwa nge-menopause.
Lesi yisigaba owesifazane afinyelela kusona lapho amaqanda asuke engasakhiqizi i-hormone ebizwa nge-oestrogen ngendlela eyejwayelekile. Lokhu kuba nemithelela ethile emzimbeni wowesifazane.
Lo mcimbi uzokuba ngoMgqibelo ngomhla ka-18 kuMfumfu (October), eLa Collezione, eMhlanga. UDkt Sibu Lubelwana, ongudokotela wabesifazane, futhi ongumhleli walo mcimbi, uthi uyinkundla yokwabelana kwabesifazane ngolwazi kwabadlula kulesi sigaba nezazi zezempilo.
Echaza ngeMenopause Summit uthe: “Sikubone kubalulekile ukuba nenkundla enjengalena ukuze abadlula kulesi sigaba babone ukuthi kababodwa, futhi bangazizwa bebandlululeka. Lo mcimbi ngonyaka owedlule ube yimpumelelo enkulu, okukhomba ukuthi siyadingana singabesifazane.
“Sizobe sinabesifazane abadlula kwi-menopause, izazi zezempilo, abezomthetho, nabazosihlaziyela ukuthi singazinakekela kanjani. Khumbula ukuthi kuningi oku-shintshayo kowesifazane uma efika kulesi sigaba. sizobheka ukuthi uzibona kanjani izimpawu, okokwelapha ongakusebenzisa nokuthi ucathula kanjani kukho konke odlula kukhona.”
Kuzoba khona nogxile kwezobuhle (image consultant) ozochaza ngokushintsha komzimba nokuthi ungazinakekela kanjani. Ummeli uzochaza ngezinkontileka zemishado kanjalo nama-sexologist kwazise nenkonzo yasekamelweni nayo ibalulekile. Umeluleki wezezimali uzochaza ngokubaluleka kokuhlela ezempesheni nokonga.
“Ngimema wonke umuntu wesifazane ukuthi asondele neno ukuze aqonde ukuthi kwenzekani kuyena, futhi leli kuzoba yithuba lokuhlangana nabanye besifazane abadlula esimweni esifanayo,” kuchaza uDkt Lubelwana.
Phakathi kwezimenywa ezinohlonze singabala kuzona uDkt Sibongile Mashaphu, uSolwazi Boitumelo Phakathi, uDkt Mpume Zenda, uDkt Nomandla Tsibiyane nabanye. Amathikithi alo mcimbi atholakala eQuicket (www.quicket.co.za).
