ABESILISA sebezoba nelungelo lokushintsha isibongo uma sebeganiwe, babize isibongo senkosikazi.
INkantolo yezoMthethosisekelo ithi linyathelekile ilungelo labesilisa lokuba bakwazi ukushintshela esibongweni samakhosikazi abo uma bethanda ukwenza kanjalo.
NgoLwesine ekuseni le nkantolo ikhiphe isinqumo sokuthi ingxenye engaphansi kwesiSigaba 26 soMthetho wokuBhaliswa kokuZalwa noKufa kwaBantu siyaphambana noMthethosisekelo wezwe – sinyathela ilungelo lamadoda lokuba akwazi ukushintshela ezibongweni zamakhosikazi awo. Kanjalo futhi nelungelo lowesifazane liyanyatheleka ngokuthi indoda yakhe ingakwazi ukushintshele esibongweni sakubo kwakhe owesifazane.
Inkantolo ithi lo mthetho uyacwasa ngokobulili, yanquma ukuba iphalamende lilungise leli phutha elikulo mthetho.
Ngesikhathi iJaji lale nkantolo uMahluleli uLeona Theron, lethula isinqumo lithe iphalamende kuzofanala likhethe ukuthi liyawuchibiyela lo mthetho noma lishaya omusha. Iphalamende linikezwe yile nkantolo iminyaka emibili ukuba lilungise lelo phutha – emuva kwalokho amadoda ayobe esekwazi ukushintsha izibongo ngokusemthethweni.
