BEKUVUNGUZA umoya wobumbano nokubekezelelana phakathi kwamalungu amaqembu ezombusazwe nabaholi bawo kuzwelonke. Namuhla inhlangano eyengamele ukhetho kuleli i-IEC iqhuba umsebenzi wokuvala izikhala ezivulekile emawadini ahlukene kuleli.
Phakathi koMasipala okuvotwa kubona kubalwa owasoPhongolo ku-ward 12 nowaKwaDukuza ku-ward 28 esiFundazweni iKwaZulu-Natal. Kuyavotwa naseMakhado, ku-ward 09 eLimpompo, eJohnnesburg ku-ward 82 no-99. Kuyavotwa nase-Eastern Cape, kuMasipala iNtsika Yethu, ku-ward 13. Kuvunguza umoya wobumbano nokuthula kuzona zonke lezi zinketho.
KwaZulu-Natal kubonakale abaholi be-IFP, i-ANC neMK Party bexhawulana kukuhle ngaphandle kwezikhungo zokuvota.
Ubhekwe ngabomvu umphumela waku-ward 28 KwaDukuza ngemuva kokuba amaqembu amabili amakhulu ayizimbangi okuyi-ANC neMK Party egadle ngosondonzima bawo kukhankaselwa lolu khetho.
UMnu Jacob Zuma ongumholi weMK Party uziyele mathupha kule ndawo ngeledlule eyogayela iqembu lakhe ivoti.
Usihlalo we-ANC eKZN uMnu Siboniso Duma ukhona ukuzoqhubeka nokunxenxa amavoti. Phakathi kwabanye abaholi be-ANC abafikile kuleli ward kubalwa uMnu Senzo Mchunu osesigungwini esiphezulu kuleli qembu.
