ULULE isandla ekwakhiweni kwesikhungo somphakathi, esakhiwa yibandla lamaWeseli, uNgqongqoshe wezokuBusa ngokuBambisana nezoMdabu KwaZulu-Natal, uMfundisi Thulasizwe Buthelezi.
Lokhu kuvezwe yibandla iMethodist Church of South Africa, elaziwa ngokuthi amaWeseli, emcimbini wesidlo sebandla oThongathi ngaphansi kwesiFunda iNatal Coastal, eThekwini ngempelasonto. Kulo mcimbi obuhanjelwe ngowengamele ukusebenza kukahulumeni KwaZulu-Natal, uMnu Sboniso Duma, onguNgqongqoshe wezokuHlaliswa kwaBantu nezokuThutha, noMfu Buthelezi, ibandla lithe uShenge ubengowokuqala ukwelula isandla.
Lesi sikhungo esizokwenza imisebenzi ehlukene sizokwakhiwa ngomnikelo wabazalwane. Kuvezwe ukuthi inhloso yaso wukuba nomphakathi usisebenzise. UMfu Buthelezi uthe uyakweseka okufiswa yibandla ngoba lesi sikhungo sizohlomulisa isifundazwe, hhayi amalungu ebandla ku-phela. Uncome umsebenzi omuhle webandla, wathi elikwenzayo wumsebenzi kaNkulunkulu.
“Ibandla kumele lidlale indima ebalulekile emiphakathini. AmaWeseli ayaziwa ngemisebenzi ayenzela imiphakathi ngokwakha izikole nezibhedlela kusukela eminyakeni edlule. Namanje lokhu enizokwenza kuzoba yimpumelelo. Ibandla lenkosi liqoqa izintandane, lifundisa izingane ezihlwempu, lakha nesimilo kubantu,” esho.
UMbhishobhi Linda Mandindi, owengamele isiFunda, ubonge uButhelezi ngokuthi abe ngowokuqala ukunikela. Uthe ukuqoqa imali yokwakhiwa kwalesi sikhungo kuwumqansa kakhulu.
“Sibonga ongqongqoshe nangokuhlonipha isimemo sethu siyibandla,” kusho yena.
Uthi bazimisele ngokwenza umehluko omkhulu kule ndawo. UMnu Gavin Dalgleish oyiCEO yeTongaat Hullets, esebenzisana nebandla, uthe kuningi ukusebenzisana okusazoba khona njengoba nabo bekholelwa kakhulu ekubuyiseleni emphakathini obesekayo ebhizinisini labo.
UNgqongqoshe uDuma obemele uhulumeni wesifundazwe, uthe imizamo yabazalwane bayayeseka ngoba ilekelela uhulumeni.
“Uhulumeni uzimisele ngokusebenzisana okuhle namabandla, nangenhlalo enhle yabantu. Lo khu okwenziwa yibandla kusho lukhulu ngoba kulekelela abantu bakwaZulu-Natal,” kusho uDuma.
Lo mcimbi ubuhanjelwe nangowayeyimeya yeTheku uNkk Zandile Gumede.
