AZOKUBE etelebhela ngalempelasonto amahhashi kwiBabanango Rural Horse Racing ehlelwe wumasipala wasoLundi ukuzilungiselela iDundee July.
Kulo mjaho oba minyaka yonke kuzokube kugaduliswana emilenzeni ewu-7 kubangwa isiteki sika-R30 000 kanti umjaho omkhulu uphethe u-R11 000.
Umdlalo wamahhashi usukhule kakhulu KwaZulu-Natal njengoba sekunabantu asebeziphilisa ngawo ukuxosha ikati eziko.
IMeya yasoLundi, uMnu uWilson Ntshangase ithe: “Kuyinto enkulu kuthina singabaholi bomphakathi ukuqinisekisa ukuthi siyasondela emphakathini ikakhulukazi kwintsha ngezemidlalo eyahlukene. Sibhekene nenkinga enkulu yobubha ngakhoke imidlalo efunze lena ibuyisa ithemba kuyo nasemphakathini wonkana.
“Lo mjaho siba nawo minyaka yonke futhi sizoqinisekisa ukuthi uyaqhubeka ngoba umphakathi uyawuthakasela. Siyafisa ukuwubona ukhula kungene abaxhasi. Lo mjaho wandulela iDundee July okuwumjaho omkhulu wasemakhaya, iKing Cetshwayo Rural Horse Racing ekhula ngesikhulu isivinini kanjalo neHarry Gwala Summer Cup okuyimijaho eyishintshe kakhulu impilo yentsha ngenxa yemiklomelo eyikhiphayo ngokwehlukana. Sikhiphe imali ewu-R30 000 ezokube ibangwa emilenzeni eyisikhombisa esinayo.”
Iningi lomasipala besifundazwe banayo imijaho yamahhashi ezindaweni zabo, ngenyanga edlule bezishukana kumjaho waseMtuba kanti maduze kuza iNkandla May neminye eminingi.
Umnyango wezeMidlalo wesifundazwe uthi usiziqalile izinhlelo zeDundee July yanonyaka ezolandela iHollywoodbets Durban July eba minyaka yonke ngoMgqibelo wokuqala kaJuly.
