INHLANGANO ethi ilwisana nokucwaswa wabokufika, iSiyafana Sonke Action Campaign, ithi uhulumeni akabavikela abokufika ababalelwa ku-250, abenqaba ukuya esikhungweni iLindela Repatriation Centre, eGauteng.
Inhlangano engenzi inzuzo, iGift of the Givers, ngoLwesibili, ikhiphe amabhasi ukuthi athuthele abakufika abakanise ngaphandle kwamahhovisi, oMnyango wezaseKhaya, egwaqweni uChe Guevara, eThekwini, koLindela baseGauteng.
Abokufika bese behlale ngaphandle kwala mahhovisi kusukela ngenyanga kaNhlaba (May).
Okhulumela iSiyafana Sonke Action Campaign, uBishop Raphael Bahebwa, uthi ukuthuthela abokufika koLindela kuwukuhlukumeza amalungelo abo.
“Ukuthuthela abantu kulaboLindela akusona isixazululo. Leziya ndawo zifana nasemajele, futhi nezimo zazo azikulungele ukuhlala abantu. Sifuna uhulumeni, amaphoyisa, nezinhlaka zomthetho zingenelele, zivikele abantu abangafuni ukuya kulezi zindawo,” esho.
Abokufika, abasahleli kuChe Guevara Road, basanda kutholana phezulu namalungu eMarch and March, ngoba asephinde asonga ngokuthi azoba nokhukhulelangoqo wombhikisho ngomhla ka-30 kwephezulu.
