BUGQAME bha okwekati elimhlophe ehlungwini ubudlelwane obuqinile phakathi kobukhosi bakwaNtombela eBabanango nobaseNdlunkulu kaZulu. Lokhu kubonakale ngokuhambela kweSilo uMisuzulu Zulu noNdlunkulu wakhe uMaMyeni emshadweni wesintu eNanda, obusoHlange Stadium kuganiselana ubukhosi bakwaNtombela nobaseMaqadini.
Bekushada uNkz Ntokozo Ntombela noMnu Nhlakanipho Ngcobo. UNkz Ntombela uzalwa usomabhizinisi ohlonishwayo esifundazweni iKwaZulu-Natal, uMnu Muzi Ntombela. Kulo mshado, indlunkulu kaZulu itheleke nezindimbane zamabutho eSilo kanti nobakwaNtombela bufike ngothi lwabo.
Phakathi kwezikhulu zikahulumeni ebekade zikhona, kubalwa uNgqongqoshe wamaphoyisa kuleli uMnu Senzo Mchunu, uNgqongqoshe wezeSayensi uDkt Blade Nzimande, uNdunankulu wakwaZulu-Natal uMnu Thami Ntuli, owanguNgqongqoshe wezamasiko namaciko kuleli uMnu Zizi Kodwa, isekela likaNgqongqoshe wezisebenzi kuzwelonke uMnu Jomo Sibiya, iNkosi uZuzifa Buthelezi wakwaButhekezi oNdini, abantwana baseNdlunkulu nabanye abaningi. Kunandise umculi kamasikandi uKhuzani “iNdlamlenze” Mpungose.
Mthobisis@ilanganews.co.za
