KULINDELEKE ukuba namuhla ngoLwesibili amalungu ePhalamende avote mayelana nesiphakamiso seBuild One SA (Bosa) sokushintshwa kwenani lamamaki okuphashwa ngawo kumatikuletsheni, sisuswe ku-30% siye ku-50%.
Lokhu kuza ngemuva kwenkulumo-mpikiswano yangoLwesihlanu lapho uMnu Mmusi Maimane, ongumholi weBosa, ethe njengoba izwe libhekene nenkinga yokweswela umsebenzi kwentsha, ukugcina amamaki okuphasa ku-30% kuwukuzenzela phansi. Ziningi nezinye izinhlaka ezikhala ngokuthi u-30% kawusho ukuthi usukulungele ukusebenza.
IBosa ithi kumele kubuyekezwe izinga lokuphasa, libuyiselwe ku-50%, njengoba ikholelwa ekutheni lokhu kuzokwenza othisha babhukule, kwenyuke izinga lemfundo ezweni.
“Mawuqedwe lo 30% okuphaswa ngawo manje. Sekuyisikhathi iBosa isho lokhu kodwa kubonakala sengathi uhulumeni waseNingizimu Afrika uyawuvikela lo mgomo. Uma umuntu ethole u-30%, kusho ukuthi akazi lutho ngaleso sifundo. Lokhu kwenza kube kuncane kakhulu okulindelwe kothisha emsebenzini wabo,” kusho uMaimane.
