BAHLANGABEZANE nezimbila zithutha ziholwa ngemhlophe phambili abesilisa abathathu abaqothwe ngezulu lezandla eShemula, bude buduze nedolobha laKwaSkhemelele, KwaMhlabuyalingana.
Kubikwa ukuthi abalisa abane bangene komunye wemizi yasendaweni, bavusa umnikazi wemoto ngoba befuna ukuyithatha. Umnikazi wemoto kuthiwa uvele wavulela ngezulu lezandla ebhekise kubona. Ababili basale enkundleni, owesithathu obaleke nenhlamvu washonela emgwaqweni, kanti owesine ubesagcwele amathafa.
Ezinkundleni zokuxhumana abantu abaningi bazwakalise ukuthokoza ngalesi sigameko, bancoma umnikazi wemoto ngokuba nesibindi sokuvikela into yakhe.
Kunezinsolo zokuthi lezi zigilamkhuba kungenzeka kube ngabantu ababodwa abasolwa ngokudubule babulale uMnu Sphamandla Maphanga obengumfuyi odumile eMkhanyakude. UMaphanga ubulawe maqede kwathathwa isibhamu nemoto yakhe, etholakale ilahlwe eSicabazini, KwaMhlabuyalingana.
Ubekwe namuhla ngeSonto endlini yakhe yokugcina eHluhluwe.
Ingaphezulu kweminyaka ewu-15 iminyaka kubikwa ngenkinga yokwebiwa kwezimoto zakuleli okusolakala ukuthi zephucwa abanikazi maqede zingene ngaphakathi eMozambique, zingabe zisabuyiswa kuleli.
Isigameko esenzekile singesesithathu ukwenzeka kule ndawo njengoba eminyakeni eyedlule senzeka eNdumo, okuyilapho khona umnikazi wemoto walalisa uyaca lwamadoda amane ayezomduna imoto. Kwesinye umufi, owayengunogada, wadlula emhlabeni namadoda amathathu awaqotha ngesibhamu sakhe i9MM ngesikhathi ezama ukumduna imoto yakhe iBMW.
