UBEFUNELWA uxhaxha lwamacala abucayi owesilisa oneminyaka ewu-22 osale enkundleni ngesikhathi itholene phezulu ngezulu lezandla namaphoyisa eMahlabathini, eVerulam, izolo ngoLwesine.
Ngokombiko wamaphoyisa aKwaZulu-Natal abasolwa ababili badubulane namaphoyisa abezama ukumisa imoto abebehamba ngayo.Â
Kuvele ukuthi umsolwa ungumholi weqembu lezelelesi (gang) elihlalise lubhojozi umphakathi waseNanda namaphethelo. Kuvele nokuthi angaphezulu kweshumi amacala okubulala abefunelwa wona, okubalwa awokuzama ukubulala nokubamba inkunzi kuhlonyiwe.
Okhulumela amaphoyisa uLt-Colonel Robert Netshiunda uthe bathole athole umkhondo wokuthi abasolwa basuka eMhlanga, eThekwini, ukuyolanda izidakamizwa nezinhlamvu zezibhamu. Kuthe amaphoyisa uma ebona imoto abebehamba ngayo, ezama ukuyimisa, abasolwa badubula bebhekise kuwona, nawo aphendula ngezulu lezandla.
ILANGA lifike endaweni yesigameko amalungu omphakathi emi izixongololo, isidumbu somunye wabasolwa besidindilize phansi.
Ukhomishana wamaphoyisa KwaZulu-Natal, uBrigadier Nhlanhla Mkhwanazi, obekhona endaweni yesigameko, uncome amaphoyisa ngomsebenzi awenzile.
phumlani@ilanganews.co.za
