NGUMNU Nhlalayenza Ndlovu owayeyikhansela leDA, owadutshulwa wabulawa emzini wakhe oseMpophomeni, eHowick.
USHAYE ingqimphothwe, wahoxisa isicelo sokudedelwa ngebheyili owesilisa osolwa ngokuba nesandla ekufeni kukaMnu Nhlalayenza Ndlovu, owayengusotswebhu we-DA kuMasipala uMngeni.
UNdlovu wadutshulwa amahlandla ayishumi phambi kwamalungu omndeni wakhe oseMpophomeni, eHowick, ngoZibandlela (December) ka-2023.
UMnu Thobani Hlongwa (31) ubevele ngoLwesine eNkantolo yeMantshi yaseHowick, lapho bekulindeleke ukuba aqhubeke nesicelo sakhe sebheyili, kodwa watshela inkantolo ukuthi useyasihoxisa. UHlongwa ubevele enkantolo nomunye wesilisa osanda kuboshelwa lona leli cala.
UHlongwa, okusolwa ukuthi uyilungu lamaqembu ahlalise kabuhlungu umphakathi waseMgungundlovu, waboshwa ngenyanga kaMfumfu (October) nyakenye, watholakala nesibhamu nezinhlamvu okungekho emthethweni.
Ngaphakathi enkantolo kuvele ukuthi uHlongwa nozakwabo babengazi ukuthi baqashelwe ukubulala umuntu ongusopolitiki, futhi nomufi babengamazi ukuthi ungumholi womphakathi.
Umsolwa wesibili osanda kuboshelwa leli cala, kuvela ukuthi ungomunye wabantu ababehamba phambili ngokugovuza umphakathi ulwisane nabantu abaphikisana nokusentshenziswa kukagesi ngaphandle kokuwukhokhela.
UHlongwa watshela inkantolo ukuthi akahlobene nesigameko sokubulawa kukamufi ngoba ngosuku lwesigameko wayekubo, ehleli nonina kanye nogogo wakhe. Kwabuye kwavela ukuthi uHlongwa ungusomabhizinisi onesitolo esithengisa inyama, abuye abe ngumnikazi wenkampani ethengisa isihlabathi endaweni yaKwaPata.
UMnu Francios Rodgers, ongumholi weDA KwaZulu-Natal, uthe leli qembu liyasemukela isinqumo sokuhoxiswa kwesicelo sebheyili.
“Iqembu lethu lakhipha imali engaphezulu kwesigidi linxusa ongaba nolwazi ukuba asondele ngaphambili nalo. Ngaphezu kwalokho, saziqashela umphenyi ozimele ngoba sifuna ukwenza ukuthi ube lula umsebenzi wamaphoyisa. Siyakwemukela nokuboshwa komholi womphakathi osolwa ngokuba nesandla ekufeni kukaNdlovu esikholwa wukuthi wabulawelwa ukulwisana nokuthengiswa komhlaba kanye nokuphikisana nokuntshontshwa kuka gesi,” kusho uRodgers.
