SEBENQUNYELWE ugwayi katiki abanikazi bamapulazi nabezinkampani, abaqasha abakufika abanganawo amaphephamvume, abagunyaza ukuba seNingizimu Afrika.
IPhini likaNgqongqoshe wezemiSebenzi yoMphakathi neNgqalasizinda kuZwelonke, uMnu Sihle Zikalala, ligasele emapulazini amathathu nasenxanxatheleni yezitolo, eNdwedwe, lihamba nezikhulu zeminyango, owezezisebenzi, owezasekhaya, namaphoyisa. Bebelunywe indlebe ngabantu baseNdwedwe, ngokuthi kunamapulazi aqasha abokufika, abakuleli zwe ngokungethetho.
“Ngesikhathi sifika sizohlola, abakufika abaqashwe laphaya, banele basibona, babaleka, abanye beqa ucingo. Amaphoyisa akwazile ukubabamba. Sithole ukuthi ngabantu basemazweni angaphandle, abangenazo izimvme zokuba kuleli zwe.
“Laba bantu, baholelwa imali encane, engaphansi kakhulu kuleyo ebekwe wuhulumeni ukuthi abantu kufanele baholelwe yona (minimum wage). Njengoba besebenza, kabanayo imihlomulo, futhi ababhalisiwe,” kusho uZikalala.
IPhini likaNgqongqoshe wezeziSenzi, uMnu Jomo Sibiya, lithe laba bokufika mababuyele emazweni akubo ngoba bazobuya bazohlola ukuthi basekhona yini. Uxwayise abezitolo ngokuthi azovalwa amabhizinisi abo uma beqhubeka nokuqasha abokufika abakuleli zwe ngokungemthetho.
