ISEKELAMENGAMELI uMnu Paul Mashatile uthi kuyakhathaza ukuthi iNingizimu Afrika ingelinye lamazwe anezibalo eziphezulu zabantu ababulawa yisifo sofuba iTB, yize selapheka.
Ukusho lokhu ethula inkulumo yosuku emcimbini wokugubha iWorld TB Day izolo ngoMsombuluko, elokishini iGamalakhe, oGwini.
“Indaba yeTB ayikho mayelana nezokwelapha uphela, yinto ethinta amalungelo abantu. Wonke umuntu, kungakhathalekile kuthi uvelaphi, unelungelo lokuthola imishanguzo yokusindisa impilo yakhe,” kusho uMashatile.
Ubekhuluma kulo mcimbi njengosihlalo weSouth African National Aids Council (Sanac). Wethule umkhankaso kahulumeni, i-End TB Campaign, okuhloswe ngayo ukuthi kuhlolelwe iTB abantu abawu-5 million ngaphambi kokuphela kukaNdasa (March) wonyaka ozayo.
“Lokhu kuzokwehlisa ngo-29% isibalo sabantu abatheleleka ngaleli gciwane, kuqinise nemizamo yokwehlisa ngo-41% isibalo sabantu ababulawa yiTB ngaphambi kuka-2035,” esho.
Unxuse ukuba kubanjiswane ukuze kuqedwe lesi sifo esibulala izinkulungwane zabantu.
