THANDOLUHLE NGUBO
UBIZWE ngosathane, kwathiwa makahambe ayobolela ejele – emuva kwalokho kwaqhuma imikikizo – owesilisa ogwetshwe yiNkantolo eNkulu yaseMtubatuba odilikajele ababili neminyaka ewu-5 ngokudlwengula abulale intombazanyana eneminyaka ewu-7 ubudalala. NgoLwesihlanu le nkantolo igwebe uLindokuhle Christopher Mhlongo (33) (osesithombeni) emacaleni okuthumba, ukubulala nokudlwengula uZanokuhle Khumalo (7), ngoNtulikazi (July) nonyaka eDumisani Makhaye Village, eMpangeni.
Amalungu omphakathi abejabule ngesigwebo, ashaye imikikizo, aphelezela umbulali ngamagama anesisindo.
IJaji u-Elise-Marie Bezuidenhout lithe kalisibonanga isizathu sokumzwela uLi-ndokuhle ngoba naye akabanga nozwelo kuZanokuhle. Ngesikhathi uLindokuhle evuma icala ngeledlule, uveze ukuthi wayehleli phandle kwendlu ayeqashe kuyo, ebhema ngesikhathi ebuka umufi edlala nezinye izingane, wambiza wathi makangene endlini yakhe athathe ishumi.
Uthi wathi angangena (umufi), wamlandela, wavala isicabha, wambamba ngenkani wayomphonsa embhedeni. “Utshele le nkantolo ukuthi ngesikhathi umdlwengula, umbonile ukuthi usezinhlungwini, wamyeka wacabanga ukumdedela, kodwa wabona ukuthi uzokuceba, wamncisha umoya ngokumvala amakhala nomlomo ngesandla, wamklinya ngesinye,” kusho ijaji.
ULindokuhle esitatimendeni uveze ukuthi uthe angabona ukuthi usethule umufi, wamsonga ngoplastiki, wamfaka esikhwameni esifaka izingubo zokulala, wamfihla ngaphansi kombhede, wabe eseyabaleka.
Ijaji lithi likholwa wukuthi uLindokuhle kumele asuswe emphakathini ngoba uyingozi, ikakhulukazi emantombazaneni.
UNkz Nondumiso Khumalo ongunina kaZanokuhle, ubonge ukuthi icala seliphothuliwe, yize ethi ubuhlungu bokushiywa yindodakazi yakhe ngalolu hlobo buyohlala bukhona.
ngubo@ilanganews.co.za
