UDABA NEZITHOMBE: NGU-LUCKY CAIN
KUKHONA abakhethe ukuyozibhukudela okwandle kunokuba bayongena ngaphakathi enkundleni yezemidlalo Moses Mabhida, eThekwini, lapho bekuqhubeka khona umcimbi wokugubha unyaka iqembu iMK Party lasungulwa, namuhla ngeSonto.
Nakuba Moses Mabhida ibinezinkumbi zabantu kodwa kunabanye abakhethe ukungazixaki ngobekwenzeka khona, abehle ezithuthini ebezihlelwe yileli qembu ukulanda abantu ezingxenye ezehlukene zaKwaZulu-Natal, bayozipholela olwandle.
Ilanga likhipha umkhovu etsheni eThekwini njengoba amabhishi egcwele phama.
Amaphoyisa kaMasipala weTheku asiqaphile isimo njengoba evale emgwaqweni eminingi engenela olwandle. Zonke izimoto ezingenela emabhishi ziyavinjwa, ziseshwe, ngaphambi kokuba zivunyelwe ukungena.
Kubonakale abanye abantu bebhukuda ngazo izikhibha zeMK Party.
INTATHELI: LUCKY CAIN
