UNDUNANKULU waKwaZulu-Natal, uMnu Thamsanqa Ntuli uthe ukhiye okhethweni olunokuthula nolukhululekile, kuzoba ukukhula kwezombangazwe nokubekezelelana kumaqembu epolitiki.
UNtuli ubekhuluma emkhulekweni, lapho bekuthandazelwa ukubulawa kosopolitiki obungoMsombuluko, eMulti purpose centre, kwaNongoma ngaphansi kwesifunda iZululand.
Kulo mkhuleko bekuhlangene amalungu esishayamthetho salesi sifundazwe, abezenkolo, amaphoyisa kanjalo namalungu omphakathi.
Ucacise ukuthi uhulumeni wakwaZulu-Natal namaphoyisa ngeke bakubekezelele ukusatshiswa kwabantu, ukungabekezelelani nokusabalalisa okungekhona njengoba kuqhubeka imikhankaso yokhetho loHulumeni baseKhaya oluzoba ngomhlaka 4 kuLwezi (November).
“Sesikhulile kwezombangazwe esifundazweni sethu. Lokhu kucacisa ngokusobala ukukhula ngokwentando yeningi. Konke kusemahlombe amaqembu epolitiki ukuthi afundise amalungu awo ukuthi angaphazamisi ilungelo lomunye umuntu. Wonke umuntu unelungelo lokuthi abe seqenjini lepolitiki alithandayo,” esho.
Eqhuba uNtuli uthe uhulumeni wakwaZulu-Natal unethemba elikhulu ukuthi ukhetho oluzayo luzoba ngolukhululekile futhi ngeke kuphazamiseke muntu ngesikhathi salo.
Kulo mkhuleko uNtuli uthe ubona ukuthi kufeziwe manje futhi noMdali usezwile. Uthe bakhethe uNongoma okuyindawo ebalulekile njengoba kuyisehlalankosi. Uveze ukuthi nomna iSilo besingekho kodwa basendaweni yaso. Lokho kukodwa kuyisibusiso.
Uthe kuyamjabulisa ukuhlangana nabaholi bakamoya ngoba abalisabi ijele ngokumela iqiniso futhi bakusho kucace ukuthi uNkulunkulku akafuni nabantu bakhe. Uma bebulawa naye uyacasuka.
