IZOKWENZA konke okusemandleni ukuvuselela amagalelo owayeyisilomo sikamaskandi uMtshengiseni “iNdi- dane” Gcwensa (ongasekho), iMpucuzeko Maskandi Festival.
Lokhu kuvezwe ngumhleli wayo uMnu Xolani Mcineka ngoLwesibili ebusuku eKZN Music House, eThekwini, kwethulwa izinhlelo zakulo nyaka zomci-mbi ozokuba mhla ka-29 kuNcwaba (August) ePeople’s Park, eMoses Mabhida Stadium, eThekwini.
UMcineka uthe kunohlelo olukhethekile lokwenziwa kwesikhumbuzo ngokuhlonishwa kweNdidane. Uveze ukuthi amagalelo ayo awakhohlwakali. Utshele abezindaba ukuthi kunezikhathi lapho iNdidane yayihlenga khona lo mcimbi ngamaqhinga ayo sekuvalwe amehlo, ingekho imali yokukhokhela amaciko ayeqashiwe.
“INdidane yayikholelwa kwiMpucuzeko, iqinisekisa ukuthi ifika nabalandeli bayo ngobuningi futhi ibatshela ukuthi abakhokhe bonke esangweni. Lokho bebekwenza ngokuhlonipha, abakaze baphazamise umcimbi weMpucuzeko abalandeli.
“Ngomunye unyaka yafika emcimbini ivuka ekuguleni, isimo sayo sibuhlungu, yanginika isibindi, yathi uma sekumenyezelwe ukuthi iyeza emcimbini, kuzogcwala ngoba yiyona ebhekwe kakhulu endimeni yomculo wesintu.
“Nangempela kwagcwala, yatholakala nemali yokukhokhela abaculi ngoba ngaleso sikhathi sasine- nkinga yokuthola uxhaso lwemali olwanele. Ngakho-ke siyiMpucuzeko, sifuna ukwenza iqiniso emndenini weNdidane nakubalandeli bayo, ngomsebenzi wayo omuhle eyawenza isaphila endimeni yomculo, nasemcimbini weMpucuzeko,” kusho uMcineka.
Uthe usuku lomcimbi kuyoba ngolwekhethelo lweNdidane. Ngakolunye uhlangothi indodana yeNdidane, uSphesihle Gcwensa, ithe kubajabulisile ukuthi uyise akhunjulwe. Ithe umndeni ukwamukele ngezandla ezimhlophe ukuhlonishwa kukayise.
“Sijabule kakhulu uma uMcineka esakholelwa emsebenzini kababa,” kusho uSphesihle.
Uthe banezinhlelo zokuthi iqembu laMageza Amahle (likayise) lenze imigilingwane ngalolu suku. USphesihle uveze ukuthi phakathi kwezifiso zakhe, wukuthi abaculi abasebenze noyise, babeyingxenye yeqembu laMageza Amahle esteji.
UMcineka umemezele amaqembu amabili esicathamiya, Abafana beKholenso neZulu Messengers, wathi azomela ucothoza kwiMpucuzeko. Uthe unesifiso sokuthi unyaka nonyaka kubekhona abaculi besicathamiya kulo mcimbi.
Kuzobe kuboshelwe abaculi abaningi abanohlonze kwiMpucuzeko okubalwa kubona uNjoko, uMdumazi, uFalabo, uDumakahle, uLimit, uKhuzani, iNkosi Yamagcokama, uBahubhe, Izingane Zoma, uBuselaphi, uShwi noMtekhala, iMfezemnyama nabanye. Amathikithi atholakala eComputickets ngo-R150. Umcimbi wesekwe wuhulumeni waKwaZulu-Natal, iSmirnoff, iPrasa, iSampra, nephephandaba ILANGA.
