KUDUTSHULWE kwabulawa oyedwa wabalisa abayanyaniswa nesigameko sokubulawa kwamaphoyisa ophiko lweCrime Intelligence. Lo mlisa ulahlwe ngelakubo ngesikhathi ethole phezulu namaphoyisa ngenganono endaweni yaseMaplazini, eNanda, ngoLwesihlanu ekuseni.
Amaphoyisa abelandela umkhondo ngabasolwa ngokubulala uCaptain Louis Nel noSergeant Mandla Khuzwayo abahlaselwa eMount Edgecombe ngoMbasa (April) nonyaka.
Oshonile ubengafuni ukuboshwa, wadubulana namaphoyisa kwaze kwaphela amahora amathathu, ekhuluma esendlini. Ngokuhamba kwesikhathi kuthiwa ukhulule intombi yakhe abezivalele nayo endlini, ngaphambi kokuba adubuleke. Kulesi sigameko kudubuleke nephoyisa leSpecial Task Force esandleni.
Khonamanjalo, kuboshwe abasolwa abayisihlanu ngokufa kukaCpt Nel noSgt Khuzwayo, okulindelwe ukuba bavele enkantolo ngoMsombuluko. Okhulumela amaPhoyisa kwaZulu-Natal, uColonel Robert Netshiunda uthe laba basolwa babanjwe ezindaweni ezahlukene – ePinetown, eManzimtoti, eMandeni naseNewlands West.
