BAZOBUYELA enkantolo ngoLwesithathu abalisa abathathu abangabaqaphi bamatekisi emgwaqweni (patrolers) abasolwa ngokuhlasela umshayeli we-Uber KwaNdengezi, entshonalanga yeTheku, emasontweni edlule.
Isuse umsindo iVideo yesigameko esabalale ezinkundleni zokuxhumana, kubonakala abasilisa abathile bevimba umshayeli wemoto encane, ohamba nabagibeli besifazane. Kuthiwa lab’ onogada babemisa le moto ngoba bethi kakumele ilayishe abantu kulo mzila, baze badubula isondo lemoto, ngaphambi kokuphipha bekhipha ngesankahlu abagibeli nomshayeli, bashaya umshayeli.
NgoLwesihlu abasolwa bebevele eNkantolo yeMantshi yasePinetown lapho befike benqatshelwa khona ibheyili. Ngokusho kwesitatimende soMnyango wezokuThutha nokuHlaliswa kwaBantu KwaZulu-Natal, kunezinsolo zokuthi umshayeli we-Uber uke wathola ukwesatshiswa ngumnikazi wenkampani eqashe laba baqaphi, i-On Call Security, ethi makalesule icala.
Kuvele nokuthi uMkhuzi wamaPhoyisa esifundazweni uJenene Nhlanhla Mkhwanazi uthumele ithimba labaphenyi ukusebenza lolu daba. Kwenzeka lokhu nje, ezinyange ezedlule uMkhwanazi waxwayisa abaqaphi bamatekisi ngokuthi akumele bavimbe izimoto ezingawona amatekisi emigwaqweni, wathi umuntu unelungelo lokuhamba ngesithuthi afuna ukuhamba ngaso.
Umnyango unxuse nenhlangano ebhekelela ukusebensa konogada, iPrivate Security Industry Regulator Authority (PSiRA) ukuqinisa isandla ezisebenzini ezingaphansi kwayo.
