UKUNGABI khona kozinzo esizweni sakwaMkhwanazi, kwaMpukunyoni, esiholwa yiNkosi uNtokozo Mkhwanazi sekusukumise uMkhuzi wamaphoyisa KwaZulu-Natal, uJenene Nhlanhla Mkhwanazi, okwenze kwabizwa imbizo ezokuba ngeSonto kule ndawo ukuxazulula lolu daba.
Isimo simuncu kulesi sizwe ngemuva kokuba iSilo uMisuzulu siphakamise uMnu Qiniso Ncube ukuba abe yiso laso eDukuduku, eyingxenye yezwe labaKhwanazi. Lokhu kuthukuthelise abaKhwanazi, bavala umgwaqo uN2, odlula kuyona le ndawo.
UJenene uMkhwanazi ulusukumele lolu daba, wacela ukubona inkosi ukudingida ngezindlela zokudambisa isimo esizweni. Ngokubambisana, bamemezele imbizo okulindeleke ibe seDukuduku.
Ikhuluma neLANGA iNkosi uMkhwanazi ithe: “Kuyiqiniso ukuthi sizoba nembizo ngeSonto eDukuduku. Umkhuzi wamaphoyisa ubelapha ezodambisa isimo, kwenziwa isiphakamiso sale mbizo. Nginethemba lokuthi umphakathi uzophuma ngothi lwawo, uzozizwela ngokwenzekayo.
“UMnyango wezokuBusa ngokuBambisana nezoMdabu esifundazweni nawo kulindeleke ube yingxenye yale mbizo.”
UNcube, wesabise ngokuthi kungenzeka bona bengamaNcube bangabi yingxenye yembizo ngoba basola ukuthi indlela ehlelwe ngayo, inokwenzelela ohlangothini lomkhuzi wamaphoyisa.
“Kasiqondi ukuthi kungani kumenywe isizwe sonke sakwaMkhwanazi, ekubeni kuyizigodi ezimbalwa ezithintekayo. Lokho sikubona njengokuthi siyocindezelwa. Thina besithi kungani kungabizwa ingxenye yethu neyakwaMkhwanazi, bese kuba wuMnyango wakwaCogta,” kusho uNcube.
Ezinkundleni zokuxhumana kubonakale uJenene uMkhwanazi eqinisekisa ukuthi kuzoba khona imbizo ngeSonto eMtubatuba.
Okhulumela uMnyango wezokuBusa ngokuBambisana nezoMdabu, uMnu Senzelwe Mzila, ukuqinisekisile ukuthi bazoba yingxenye yale mbizo.
hlongwaj@ilanganews.co.za
