BASHUMAYELE ivangeli lobunye nokubambisana emiphakathini, kusetshenziswe inhlabathi ukuhlangabezana nezingqinamba ezidalwa wububha obuhlasele ezingxenyeni ezahlukene zeNingizimu-Afrika.
UNdunankulu uMnu Thami Ntuli ehambisana noNkk Thembeni Madlopha-Mthethwa, onguNgqongqoshe wezoLimo nokuThuthukiswa koMphakathi KwaZulu-Natal, bethula ogandaganda abawu-24 eCedara College of Agriculture eHowick namuhla ngoLwesine. Laba abaholi badalule ukuthi le ngqalasizinda izokwabelwa zonke izifunda zakulesi sifundazwe.
UNtuli uthe inhloso yabo wukuba kuhlotshiswe isifundazwe ngokuluhlaza, okutshaliwe kuwona wonke amakhona aso.
“Sifuna ukuthi iKwaZulu-Natal ihlotshiswe yizitshalo ezitshalwe ngabantu bakithi. Njengoba sasithembisile singena ezintanjeni zokuhola lohulumeni ukuthi abantu sizobalethela ingqalasizinda, sesenza njalo manje,” kusho uNtuli.
UNkk Mandlopha-Mthethwa uthe bathenge nezimoto ezizosetshenziswa yizisebenzi zalo mnyango.
“Sinohlelo oluqondile lokugada izimoto zomnyango ukuthi zihamba kuphi, ngasiphi isikhathi. Sinxusa imiphakathi ukuba ibambisane nabaholi bendabuko ngoba iningi layo le ngqalasizinda izokwethulwa ezindaweni zamakhosi. Namakhansela aphethe ama-ward azokwazi ukufaka izicelo uma edinga imishini, ukuze kuzolinywa amasimu abantu,” kusho uMthethwa.
