Ilanga News
Home 9 Ezemidlalo 9 Ezibuhlungu kojokhi kubhuntsha iHarry Gwala Summer Cup

Ezibuhlungu kojokhi kubhuntsha iHarry Gwala Summer Cup

by | 19 November 2025

YIZINDABA ezibuhlungu kubadlali bamahhashi asemakhaya ukubhuntsha kweHarry Gwala Summer Cup obekufanele ibe ngoMgqibelo eKilimon, e-Underberg.

Lona ngomunye wemijaho yokutelebhela yasemakhaya ekhula ngesikhulu isivini. Uhlelwa wuMyango wezeMidlalo KwaZulu-Natal ngokubambisana noMasipala wesiFunda iHarry Gwala, nomasipala wendawo iDkt Nkosazana Dlamini Zuma.

Ukuhoxa kwalo mjaho kuthiwa kube yisinqumo esithathwe ngabe-Underberg Farmers Association, ngoba besabela ukubhebhetheka kwesifo samatele (Foot and Mouth Desease (FMD), esihlasele kwezinye izifunda.

Ukubhuntsha kwalo mjaho kuphazamise izinhlelo zojokhi abaningi abebethembe ukuthi bazokuba noKhisimusi omuhle ngamali abazoyenza kuwona.

UZakhele Mkhabela onqobe iDundee July neKing Cetshwayo Rural Horse Racing, uthe uphoxeke kakhulu ngokuhoxiswa kwalo mjaho.

“Bengizimisele ukuwunqoba. Ngibuhlungu ngokungabi khona kwayo. Abaphathi bethu babe ngamagwala. Sigijimile e-Eastern Cape ngeledlule sivele sikhona lesi sifo samatele. Sengizokhalela emjahweni waseDumbe ozokuba ngelizayo. Inkinga ukuthi umjaho waseDumbe mncane uma uwuqhathanisa neHarry Gwala,” kusho uMkhabela.
UNgqongqoshe wezeMidlalo esifundazweni uMntomuhle Khawula uthe babuhlungu ngokungabi khona kwalo mjaho. Uthe kube isinqumo esithathwe yizinhlaka eziningi ezahlukene.

Uthe inhloso yabo wukubhekelela impilo yamahhashi. Uthi bewumnyango bazoqhubeka nokuyeseka imijaho yamahhashi yasemakhaya.

Ezisematheni

UNtuli uthi ziqinile ezokuphepha ngaholidi kaDisemba

UNtuli uthi ziqinile ezokuphepha ngaholidi kaDisemba

UNDUNANKULU waKwaZulu-Natal, uMnu Thamsanqa Ntuli uthi ukuphepha kwabantu bakulesi sifundazwe akuzoncengwana ngakho njengoba benomsebenzi wokuqinisekisa ukuthi wonke umuntu uhamba ngokukhululeka. Lokhu ukusho namhlanje kwethulwa izinhlelo zokuphepha njengoba sekungena...

I-KZN ihamba phambili emacaleni okudlwengula-Amaphoyisa

I-KZN ihamba phambili emacaleni okudlwengula-Amaphoyisa

YIZE kunemibiko yokubulawa kwabantu abahlaselwa bendawonye baqothwe ngenhlamvu, ezindaweni ezehlukene,  kodwa uNgqongqoshe wamaPhoyisa kuzwelonke, uSolwazi Firoz Cachalia uthi zehlile izibalo zokubulawa kwabantu zehlandla lesibili uma kuqhathaniswa nesikhathi...